Resolución do 4 de febreiro de 2003, da Delegación Provincial de Pontevedra, pola que se dispón o rexistro, o depósito e a publicación, no Diario Oficial de Galicia, do convenio colectivo do sector de hostalería.
| Sección | III. Outras Disposicións |
| Emisor | CONSELLERÍA DE ASUNTOS SOCIAIS, EMPREGO E RELACIÓNS LABORAIS |
| Rango de Ley | Resolución |
Visto o texto do convenio colectivo do sector de hostalería, con nº de código 3600765, que tivo entrada nesta delegación provincial o día 20-1-2003, subscrito en representación da parte económica pola Federación Provincial de Empresarios de Hostalería (Feprohos), Asociación de Empresarios de Hospedaxe da Provincia de Pontevedra (Asehospo) e a Asociación de Salas de Festas e Recreativos, e, da parte social, polas centrais sindicais CC.OO., UGT e CIG, en data 17-11-2002. De conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial
ACORDA:
Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Vigo, 4 de febreiro de 2003.
Joaquín Macías Sánchez
Delegado provincial de Pontevedra
Convenio colectivo provincial de hostalería
Anos 2002, 2003 e 2004
-
Ámbito de aplicación e disposicións xerais.
A regulación das condicións de traballo, a través da negociación colectiva contida neste convenio, rexerá para as empresas e traballadores/as que, con centros de traballo radicados na provincia de Pontevedra, se dediquen á actividade de hostalería incluídas as recreativas e de ocio, e carezan de convenio propio.
Con independencia da data en que se asine e da súa publicación no BOP, este convenio terá vixencia e efectos económicos desde o 1 de xaneiro de 2002 ata o 31 de decembro de 2004.
A denuncia deste convenio colectivo, efectuada por calquera das partes lexitimadas para iso, realizarase por escrito no que constarán os artigos que se pretendan renegociar, ou a proposta de modificación que se solicita, co cal perderán a súa vixencia. Os demais seguirán vixentes un ano máis.
Co fin de evitar un baleiro legal, os artigos denunciados que no teñan cobertura por disposición legal manterán a súa vixencia en tanto no se substitúan por outros negociados entre as partes interesadas, quedando no demais as relacións entre empresa e traballador/a suxeitas ó que dispoña a lexislación legal vixente aplicable ó caso.
Da denuncia, efectuada conforme o parágrafo primeiro, darase traslado, dentro dos tres últimos meses de vixencia do convenio, a cada unha das partes que, segundo consta no artº. 5º, o negociaron.
En caso de non efectuarse a denuncia na forma prevista, este convenio prorrogarase de maneira automática en tódolos súas termos por un prazo dun ano e así sucesivamente en tanto non se faga a correspondente denuncia.
Constitúese unha comisión paritaria con fins de interpretación e vixilancia do cumprimento das estipulacións do convenio.
Formarán parte desta os vocais que en representación dos traballadores e empresarios asinaron o acordo este convenio, e será convocada cando así o solicite calquera das partes.
Interviñeron na negociación deste convenio, en representación dos traballadores/as, as centrais sindicais CC.OO., UGT, e CIG e por parte empresarial, a Federación Provincial de Empresarios de Hostalería (Feprohos), a Asociación de Salas de Festas e Recreativos e a Asociación de Empresarios de Hospedaxe da Provincia de Pontevedra (Asehospo).
A tódolos traballadores /as respectaráselles como condición máis beneficiosa a cantidade que viñera percibindo, en canto fora superior á que resulte por aplicación deste convenio, excluíndo no dito cómputo comparativo anual os importes correspondentes ós complementos de: antigüidade, manutención e aloxamento, por dereitos adquiridos a 31-12-1997,
e transporte mensual, conceptos estes que ó no entrar no referido cómputo anual se percibirán con independencia do seu resultado.
No non previsto neste convenio haberá que aterse ó disposto na lexislación e/ou normativa de carácter xeral legalmente vixente en cada momento e aplicable ó caso.
-
Contratacións e cesamentos.
O contrato de traballo poderase celebrar nas diferentes formas establecidas pola normativa laboral vixente en cada momento, formalizándose por escrito nos supostos que contemple a lexislación conforme esta, entregándolle copia deste contrato ó interesado/a.
Cando se celebren contratos, ó abeiro do artigo 15 punto b) da Lei 1/1995, do 24 de marzo, estes poderán ter unha duración máxima de 12 meses dentro dun período de 18. No caso de que se concerte o contrato por un prazo inferior ós doce meses, poderá ser prorrogado por unha única vez mediante acordo das partes, sen que a duración total do contrato poida exceder do dito límite máximo.
Tódolos contratos eventuais ou por obra ou servicio terán unha indemnización a súa finalización de 10 días de salario por ano traballado durante o ano 2003 e 12 días de salario por ano traballado a partir do 1 de xaneiro de 2004, ou no seu defecto, da parte proporcional que lle corresponda se a duración do contrato fose inferior a un ano.
Contratos formativos (artigo 11, punto 2, letra c) da Lei do Estatuto dos traballadores (LET). En ningún caso, a duración mínima pode ser inferior a 6 (seis) meses nin a máxima superior a 3 (tres) anos e a súa retribución será o 80% o primeiro ano de contrato e o 85% os dos seguintes, calculado sobre o salario fixado en convenio para a categoría en que se vai forma-lo traballador.
A partir do 1-1-2003, as empresas que en temporada baixa teñan máis de dez traballadores, obríganse a ter unha porcentaxe mínima dun 35% fixos. Cando por aplicación da porcentaxe resultase unha fracción, esta redondearase á alza ou á baixa, servindo como referencia o 0,50.
O cesamento voluntario por dimisión do traballador/a, nos casos que recolle a lei, deberá ser comunicado á empresa de forma fidedigna cunha antelación mínima de quince días á data en que deba producirse.
O incumprimento desta obriga sancionarase por parte da empresa na forma prevista na mesma lei, norma ou regra vixente en cada momento.
En cumprimento do disposto no artigo 1 da Lei 2/1991, do 7 de xaneiro, e en tanto conserve esta
a súa vixencia, a empresa estará obrigada a entregarlles ós representantes dos traballadores/as esta, a documentación a que fan referencia os números 1 e 2 do citado artigo, así como a información á que alude, o número 3 deste.
Os representantes dos traballadores/as asumen así mesmo, a obriga de sixilo con respecto ós datos que, en cumprimento das disposicións citadas, obteñan da empresa. O incumprimento desta obriga de sixilo supoñerá o quebrantamento de segredo profesional.
A empresa entregará unha proposta de liquidación das cantidades debidas xuntamente coa comunicación de aviso previo de extinción do contrato ou da súa denuncia, cando o traballador/a o solicite.
Cando o traballador/a o solicite no momento da sinatura do seu recibo de liquidación (anexo III), a empresa permitirá a presencia dun dos seus representantes nesta e se non o houbera, e o traballador/a o solicita, permitirá a de calquera outro representante legal.
Se estivese no seu dereito e dentro dos prazos previstos pola lei para iso, o traballador/a poderá efectuar reclamación sobre a súa liquidación, relacionada ó período en que prestou os seus servicios na empresa.
O traballador/a deberá cumpri-las instruccións do empresario ou persoa en quen este delegue no exercicio habitual das súas facultades organizativas e directivas, debendo executa-los traballos e tarefas que se lle encomenden, dentro do contido xeral da prestación laboral. Neste sentido, poderá levarse a cabo...
Para continuar leyendo
Solicita tu prueba