DECRETO 32/2012, do 12 de xaneiro, polo que se aproba o Estatuto da entidade pública empresarial Augas de Galicia.
| Sección | I. Disposicións Xerais |
| Emisor | CONSELLERÍA DE MEDIO AMBIENTE, TERRITORIO E INFRAESTRUTURAS |
| Rango de Ley | Decreto |
A Lei 9/2010, do 4 de novembro, de augas de Galicia, crea e regula no seu título II a entidade Augas de Galicia como ente de dereito público chamado a constituírse no instrumento central para levar a cabo a política da auga en Galicia. O organismo público, como entidade responsable en materia de augas no ámbito das competencias que corresponden á Xunta de Galicia, exerce as funcións indicadas no artigo 11 da mencionada lei.
A entidade pública exerce a súa actividade de acordo cos principios xerais establecidos no artigo 3 da Lei 9/2010, do 4 de novembro, de augas de Galicia e, en particular, garantindo a máxima eficacia no cumprimento das súas funcións e na prestación dos seus servizos, de acordo co principio de participación das persoas usuarias da auga e con pleno respecto polas competencias que corresponden ás demais administracións públicas, así como polos dereitos e intereses dos particulares.
Así, de acordo coas devanditas finalidades, as grandes liñas de actuación de Augas de Galicia diríxense nos seguintes sensos:
-
Utilización sustentable e racional da auga e contribución á preservación e mellora do medio ambiente e, en particular, dos ecosistemas acuáticos.
-
Compatibilidade da xestión pública da auga coa ordenación do territorio, a actividade económica, a conservación e protección do ambiente e a restauración da natureza.
-
Unidade de xestión e planificación da Demarcación Hidrográfica de Galicia-Costa.
-
Participación das persoas usuarias, transparencia e información ao público en xeral.
-
Eficacia na prestación dos servizos públicos de abastecemento, saneamento e depuración.
-
Recuperación dos custos dos servizos relacionados coa auga, incluídos os custos ambientais, para acadar a suficiencia financeira do sistema no marco dun prezo asequible.
-
Coordinación e cooperación entre as administracións públicas con competencias en materia de augas e obras hidráulicas.
-
Garantía da calidade da subministración da auga urbana en defensa da saúde dos cidadáns e das cidadás.
-
Solidariedade territorial nos investimentos en infraestruturas e de equidade social nas políticas tarifarias na prestación dos servizos da auga.
Para desenvolver este conxunto de accións é preciso que a entidade dispoña dunha estrutura adecuada que garanta a toma de decisións, así como a coordinación entre as súas diferentes unidades. Por isto, adóptase o seguinte modelo de estrutura: a estrutura de goberno do organismo está formada pola Presidencia e o Consello Reitor, sendo a Dirección o órgano executivo, e a estrutura de participación é integrada polo Consello para o Uso Sustentable da Auga.
De acordo co previsto na disposición adicional terceira da Lei 9/2010, do 4 de novembro, de augas de Galicia, corresponde ao Consello da Xunta de Galicia, por proposta do conselleiro competente en materia de augas, aprobar mediante decreto o estatuto polo que debe rexerse a entidade Augas de Galicia, como desenvolvemento regulamentario da súa estrutura organizativa e do seu réxime de funcionamento. Este é o obxecto do presente decreto.
Por outra parte, a disposición transitoria terceira, alínea 6, da Lei 16 /2010, do 17 de decembro, de organización e funcionamento da Administración xeral e do sector público autonómico de Galicia, ordena que as determinacións contidas no seu título III sexan de aplicación ás entidades instrumentais que foran creadas por leis anteriores á súa entrada en vigor e que aínda non tivesen aprobados os seus estatutos, de xeito que estes deberán ser aprobados adaptándose integramente ao establecido na mencionada lei. Sendo este o caso de Augas de Galicia, no estatuto que se aproba polo presente decreto dáse cumprimento igualmente ao establecido nesa disposición transitoria terceira da Lei 16 /2010, do 17 de decembro, de organización e funcionamento da Administración xeral e do sector público autonómico de Galicia. Así, Augas de Galicia constitúese como entidade pública empresarial das definidas nos artigos 89 e seguintes da nomeada lei.
Deste xeito, o Estatuto estrutúrase en tres capítulos. O primeiro refírese á natureza do ente, á súa sede e aos principios xerais de funcionamento; o segundo trata da organización interna de Augas de Galicia na dobre vertente de desenvolvemento dos preceptos da Lei 9/2010, do 4 de novembro, de augas de Galicia, no que se refire á composición e funcionamento dos órganos colexiados de goberno e de participación, e a estrutura da Dirección do ente nos seus servizos centrais e territoriais; e o terceiro regula o réxime xurídico de funcionamento de Augas de Galicia, indicando primeiramente o marco normativo en que debe actuar a entidade e, seguidamente, especificando as previsións relativas ao persoal, réxime económico-financeiro e orzamentario, contratación, recursos económicos, patrimonio, e réxime de impugnación dos seus actos.
Na súa virtude, en exercicio da facultade prevista na disposición derradeira primeira da Lei 9/2010, do 4 de novembro, de augas de Galicia, por proposta do Conselleiro de Medio Ambiente, Territorio e Infraestruturas, oído o Consello Consultivo de Galicia, e logo de deliberación do Consello da Xunta de Galicia na súa reunión celebrada o día doce de xaneiro de dous mil doce,
DISPOÑO:
En virtude da regulación prevista na disposición transitoria terceira da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, apróbase o Estatuto da entidade pública empresarial Augas de Galicia, cuxo texto figura no anexo deste decreto.
Disposición adicional primeira. Constitución de Augas de Galicia.
-
A constitución da entidade pública empresarial Augas de Galicia producirase coa celebración da sesión constitutiva do seu Consello Reitor, que terá lugar no prazo máximo de tres meses desde a entrada en vigor deste decreto, a partir da cal se realizarán todas as actuacións conducentes á súa entrada en funcionamento.
-
A entrada en funcionamento da entidade pública empresarial Augas de Galicia producirase coa súa constitución. Nesta data da entrada en funcionamento da entidade quedarán extinguidos o organismo autónomo Augas de Galicia e a Empresa Pública de Obras e Servizos Hidráulicos, subrogándose a nova entidade en todos os seus dereitos e obrigas, así como nos contratos vixentes nesa data.
Disposición adicional segunda. Persoal do organismo autónomo Augas de Galicia.
O persoal funcionario de carreira e laboral fixo que preste os seus servizos no organismo autónomo Augas de Galicia pasará a desempeñar postos de traballo na nova entidade Augas de Galicia e a prestar servizos nesta nas mesmas condicións en que se atopase con efectos desde a data da súa entrada en funcionamento, coa mesma condición de persoal funcionario ou laboral de orixe.
-
Ao persoal funcionario interino, laboral temporal e laboral indefinido non fixo que preste os seus servizos no organismo autónomo Augas de Galicia no momento da entrada en funcionamento da nova entidade Augas de Galicia pasará a desempeñar postos de traballo na nova entidade Augas de Galicia, co mesmo réxime e condicións que tiña no mencionado organismo, e co recoñecemento dos servizos prestados para os efectos da antigüidade.
Disposición adicional terceira. Persoal da Empresa Pública de Obras e Servizos Hidráulicos.
O persoal laboral fixo da Empresa Pública de Obras e Servizos Hidráulicos que, sendo seleccionado para a cobertura definitiva dun posto do catálogo de postos do ente público aprobado por este co informe favorable da Administración autonómica baixo os principios de igualdade, publicidade, mérito e capacidade, se adscriba á entidade Augas de Galicia de conformidade co disposto na disposición transitoria primeira deste decreto poderá ser integrado como persoal laboral fixo da Xunta de Galicia, consonte establece a disposición adicional décimo primeira da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
Ao persoal laboral fixo da Empresa Pública de Obras e Servizos Hidráulicos que reúna os requisitos previstos no parágrafo anterior e se atope en situación de excedencia seralle de aplicación o disposto neste.
Ao persoal que, como consecuencia do proceso previsto no...
Para continuar leyendo
Solicita tu prueba