DECRETO 70/2017, do 13 de xullo, polo que se regula a formación en igualdade e prevención e loita contra a violencia de xénero do persoal ao servizo da Administración da Comunidade Autónoma de Galicia.
| Sección | I. Disposicións Xerais |
| Emisor | Vicepresidencia e Consellería de Presidencia, Administracións Públicas e Xustiza |
| Rango de Ley | Decreto |
O artigo 14 da Constitución española proclama o dereito á igualdade e á non discriminación por razón de sexo, e o artigo 9.2 consagra a obriga dos poderes públicos de promover as condicións para que a igualdade das persoas e dos grupos en que se integren sexa real e efectiva.
O Estatuto de autonomía de Galicia establece no seu artigo 4.2 que lle corresponde aos poderes públicos de Galicia promover as condicións para que a liberdade e a igualdade do individuo e dos grupos en que se integra sexan reais e efectivas, remover os obstáculos que impidan ou dificulten a súa plenitude e facilitar a participación de todos os galegos e as galegas na vida política, económica, cultural e social.
A igualdade tamén é un principio fundamental na Unión Europea. Desde a entrada en vigor do Tratado de Amsterdam, o 1 de maio de 1999, a igualdade entre mulleres e homes e a eliminación das desigualdades entre unhas e outros son obxectivos que se deben integrar en todas as políticas e accións da Unión Europea e dos seus estados membros e, seguindo o ronsel da Conferencia Mundial sobre a Muller en Beijing 1995, parece claro que Europa aposta pola integración da perspectiva de xénero en todos os procesos e procedementos das institucións e das organizacións.
No marco estatal, a Lei orgánica 3/2007, do 22 de marzo, para a igualdade efectiva de mulleres e homes, e no marco galego o Decreto lexislativo 2/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de igualdade, introducen a previsión de políticas activas para facer efectivo este principio de igualdade, recollendo expresamente que o dito principio «informará, con carácter transversal, a actuación de todos os poderes públicos e que as administracións públicas o integrarán, de forma activa, na adopción e execución das dúas disposicións normativas, na definición e orzamentación de políticas públicas en todos os ámbitos e no desenvolvemento do conxunto de todas as súas actividades».
Pola súa banda, a violencia de xénero supón a representación máis extrema da desigualdade entre mulleres e homes existente na nosa sociedade e un grave atentado contra os dereitos humanos. Trátase dunha violencia que se dirixe ás mulleres polo simple feito de selo e por ser consideradas polos agresores como carentes dos dereitos mínimos de liberdade, respecto e capacidade de decisión. Os poderes públicos nin deben nin poden ser alleos a este problema e así, no ámbito estatal, se aprobou a Lei orgánica 1/2004, do 28 de decembro, de medidas de protección integral contra a violencia de xénero, e no ámbito autonómico, a Lei 11/2007, do 27 de xullo, galega para a prevención e o tratamento integral da violencia de xénero.
Entre os ámbitos sobre os cales se proxecta a transversalidade da igualdade e da prevención e loita contra a violencia de xénero encóntrase o relativo á formación do persoal empregado público. Así, no que atinxe á normativa estatal, con carácter xeral a Lei orgánica 3/2007, do 22 de marzo, prevé no seu artigo 51.c), dentro dos criterios de actuación das administracións públicas en aplicación do principio de igualdade no emprego público, o consistente en fomentar a formación en igualdade, tanto no acceso ao emprego público como ao longo da carreira profesional. De forma máis concreta, tanto a dita lei orgánica, nos seus artigos 24.2.c) e 27.3.d), como a Lei orgánica 1/2004, do 28 de decembro, nos seus artigos 7, 15 e 47, recollen mandatos dirixidos ás administracións públicas para que procedan, no ámbito das súas competencias, á integración do principio de igualdade na formación do profesorado, do persoal sanitario, do persoal ao servizo da Administración de xustiza e das forzas e corpos de seguridade.
No que respecta á normativa autonómica, o texto refundido das disposicións legais da Comunidade Autónoma de Galicia en materia de igualdade, xunto coas referencias, nos seus artigos 12 e 17, á formación do persoal das administracións públicas galegas en materia de erradicación do sexismo na linguaxe institucional e coa inclusión nos programas de formación do profesorado, como materia específica, da igualdade e violencia de xénero, prevé, no seu artigo 21.2, que a Administración autonómica impartirá cursos continuos de formación sobre a igualdade de xénero, principalmente dirixidos aos colectivos de educación, servizos sociais, persoal sanitario, persoal da Administración de xustiza e dos diversos corpos policiais, nos cales sempre estarán presentes contidos sobre a violencia contra as mulleres, engadindo que en todos os plans de formación, organizados pola Administración autonómica para o seu persoal, existirá un módulo sobre a igualdade entre homes e mulleres».
Na mesma liña, o artigo 15 da Lei 11/2007, do 27 de xullo, galega para a prevención e e o tratamento integral da violencia de xénero, modificada pola Lei 12/2016, do 22 de xullo, establece que a Xunta de Galicia, a través do departamento competente en materia de igualdade «garantirá, nos termos que se establezan regulamentariamente, e promoverá, mediante os instrumentos necesarios, a formación en igualdade de todos e todas as profesionais que traballan en ámbitos relacionados directa ou indirectamente coa violencia de xénero, e en especial dos e das profesionais da sanidade, dos servizos sociais, educativos, das forzas e corpos de seguridade e das operadoras e operadores xurídicos».
Igualmente, o mesmo artigo, no seu número 3, dispón que «a Xunta de Galicia, a través do departamento competente en materia de igualdade, deseñará programas específicos de formación en materia de violencia de xénero e poraos á disposición de calquera ente, organismo ou departamento, e da sociedade en xeral, para a súa aplicación nas diversas accións formativas».
Pola súa banda, o VII Plan estratéxico de Galicia para a igualdade de oportunidades entre mulleres e homes 2017-2020, aprobado en marzo de 2017 polo Goberno galego, establece no seu capítulo primeiro «Integración do principio de igualdade nas políticas e accións do goberno» un propósito renovado que busca consolidar a posición de Administración exemplar da Administración autonómica no deseño, execución e seguimento de políticas das cales mulleres e homes se beneficien de forma equivalente, contribuíndo ao progreso e ao benestar do conxunto da sociedade galega, centrándose en conseguir un maior impacto e eficacia da acción pública en prol da igualdade de trato e de oportunidades entre mulleres e homes.
Tendo en conta todo o anterior e considerando que a integración da igualdade de oportunidades na totalidade de actuacións das administracións públicas depende, en gran medida, da formación das persoas que traballan nelas, considérase necesario e imprescindible promover que todo o persoal recollido no artigo 2 do presente decreto posúa a dita formación, garantindo para iso a unha oferta continuada e permanente de accións formativas (básicas e/ou especializadas) no ámbito da promoción da igualdade entre mulleres e homes e da prevención e a loita contra a violencia de xénero, e prevendo a valoración da dita formación no acceso á función pública, na promoción profesional e nos concursos.
Faise preciso ditar unha norma que materialice esta necesidade da formación, así como os mecanismos para obtela e para acreditala, tanto na provisión da totalidade dos postos de traballo que ocupara o persoal ao servizo da Administración da Xunta de Galicia, como nos concursos que se convoquen para o citado persoal.
Segundo os preceptos indicados, a Xunta de Galicia amosa con esta norma o seu compromiso coa igualdade entre mulleres e homes e en contra da violencia de xénero, ao regular a través do presente decreto, a formación en xénero da totalidade de...
Para continuar leyendo
Solicita tu prueba